فرح- أرشيفية
جوزها قرر يتجوز عليها وبعت لها دعوة الفرح وطلب منها تيجي تبارك للعروسة ضرتها.. فكانت المفاجأة الكبيرة والمذهلة أنها راحت فعلًا القاعة وخلت ضرتها واقفة بترقص بالفستان الأبيض وجابتها من شعرها وسط المعازيم إللي كانوا مذهولين ومصدومين من إللي حصل.
فضلت عايشة معاه على الحلوة والمرة ومستحملاه سنين كتير لحد ما في يوم من الأيام دخل جوزها عليها وقالها ياحبيبتي أنا عاملك مفاجأة جميلة.. أنا قررت اتجوز عليكي ودي دعوة الفرح وياريت ماتتأخريش يوم الزفاف وتيجي بنفسك علشان تباركي للعروسة الجديدة إللي هتبقى ضرتك وعايزكم تكونوا حلوين مع بعض وتحبوا بعض أنتوا الأتنين.
الست طبعًا مكانتش مصدقة في البداية وتفتكر جوزها بيهزر بس لما اتاكدت من الخبر ومن حجز القاعة بإسم جوزها راحت في يوم الزفة ودخلت القاعة لقت جوزها فعلًا بيتزف على عروستة الجديدة إللي كانت مبسوطة بالفستان الابيض وواقف ترقص وآخر انشكاح.
المشهد كان مستفز فعلًا ف راحت الزوجة الأولى هجمت على العروسة ضرتها وجابتها من شعرها وكانت عايزة تخلص عليها وتقضي على عمرها لولا المعازيم جريوا بسرعة كبيرة وراحوا يسلكوا العروسة من أيدها واتكاتروا عليها قبل ما تقع الفاس في الراس وتحصل مصيبة كبيرة ويكون معاها أي حاجة تخبطها بيها.
الموقف كان صعب أوي ومستفز لكل الأطراف سواء للزوجة الأولى إللي جوزها راح اتجوز عليها أو للعروسة الجديدة وأهلها إللي شافوا بنتهم وهي بتضرب في قاعة الفرح قدام كل المعازيم أو حتى على الزوج إللي مكانش عارف يعمل ايه أو يتصرف إزاي لأنه مكانش متوقع إن مراته الأولى فعلًا تروح قاعة الفرح والغيرة تعمي عينيها وتجيب ضرتها من شعرها قدام أهلها.
وطبعًا حصلت تعليقات كتيرة أوي على السوشيال ميديا بعد ما مقطع الفيديو ده اتسرب وكان ناس كتير متعاطفين مع الزوجة الأولى وخصوصًا الستات فقالت واحدة من المتفاعلات (والله جدعة ويسلم ايديها يعني هي بعد ما وقفت جنب جوزها طول العمر ده تبقى مكافأتها أنه يروح يجيب ليها ضرة وكمان يقولها تعالي علشان تباركي للعروسة في الفرح.. أي واحدة مكانها كان لازم تعمل كده واكتر ياجماعة كان الله في عونها).
لكن برضه كان فيه ناس كتير رافضين تصرفها ده وقال واحد من الرجالة (وهي ليه تروح تجيب العروسة الجديدة من شعرها ما تروح تتشطر على جوزها ذات نفسه وبعدين هو الراجل كان عمل إيه غلط أو حرام علشان يتقال أنه خانها.. هو يعني خانها مع واحد راجل.. ده اتجوز واحدة ست زيها وطبق شرع ربنا.. مش يمكن تكون هي إللي مقصره معاه في الواجبات والحقوق ومش لاقي راحته معاها ف بدال ما يطلقها ويشرد العيال راح اتجوز ست غيرها).